القلعةنيوز_حياة ماهر أكبر حلم للشباب صار أنه يلاقي شغل ويتوظف، البطالة بتزيد والأسعار بترتفع، كيف زبطت معكم الميزانية انكم ترفعو الأسعار بوقت الشباب مش لاقيين فيه شغل ..؟  الشباب مش لاقيين فرصة عمل توفر لهم لقمة يومهم، لو نراعي شوي أنه في ألآف من الناس عم تصحى وتنام ومش لاقيه قطعة خبز تسد جوعها، بوقت الشب صار يفضل يضل عزابي مشان مايظلم بنت الناس معه، لأنه ما معه يوفر لها أكلها وشربها وملبسها، في ناس بتشغل كل أجهزة الكهرباء إلي في بيتها حتى إلي على رصيف البيت، وناس بتخاف تشغل لمبة غرفتها لتطلع الفاتورة قيمتها بالعلالي، أنا عن نفسي بنت وبقول الله يعين كل شب بشتغل ليساعد أهله لما أشوف أبوي قاعد بدور على وظيفة ليتوظف، والبلد كلها مافيها وظيفة متخيلين.. ؟  أنا بطالب كمواطنة أُردنية بالتغيير مش بس بالمجتمع، لا بالتغيير بغلاء المعيشة والتُجار إلي بترفع الأسعار تتحاسب وبطالب بوضع حل جذري مارح أحكي للبطالة، لا حل جذري للشباب، بطالب بتعديل قانون الضمان الإجتماعي للمتقاعدين من القطاع الخاص بالتغيير والسماح لهم بالعمل وراتبهم التقاعدي يبقى مستمر شغال، بطالب بالتدقيق على الجمعيات الخيرية إلي معظمهم يدعي أنه بوزع للعائلات الفقيرة والأسر المحتاجة وهمها ...!!  أنا كمواطنة أُردنية لي الحق بأن أُناشد جلالة الملك عبدالله الثاني حفظه الله ورعاه، أن يتم التغيير لتحسين معيشة الشعب، الشعب بجوع نحن رايحين لمجاعة، نحن بنحب بلدنا بنحب ملِكنا، وبنسكت وبنتحمل، بس بدنا حل بدنا فرص عمل، الشعب مابده يشحد الشعب بده يعيش بكرامة بده يعيش مرتاح وينام الليل وهو مأمن لأطفاله المأكل والملبس ولقمة العيش بكرامة.