خلدون الرباع
بآخر فترة صار موضوع المخدرات من أخطر التحديات اللي بتواجه مجتمعنا وصار لازم كل واحد فينا يكون جزء من الحل، لأن هذه الآفة ما بتميز بين كبير وصغير ولا بين غني وفقير. بلحظة ضعف أو فضول ممكن شاب يلاقي حاله داخل بطريق صعب الخروج منه ويخسر صحته ومستقبله وأهله وكل حلم كان راسمه.
المخدرات مش دليل قوة ولا رجولة بالعكس هي استغلال للشباب ولطاقتهم وبتدمر العقل والجسم وبتخلي الإنسان يفقد السيطرة على حياته ومع الوقت ممكن يخسر دراسته أو شغله وتتفكك علاقته مع أهله وأصحابه ويوصل لمرحلة ما كان يتخيلها
عشان هيك التوعية مش مسؤولية جهة وحدها هي مسؤولية الأسرة والمدرسة والجامعة والإعلام والمسجد والكنيسة وكل شخص عنده كلمة طيبة أو نصيحة صادقة لازم نحكي عن مخاطر المخدرات بصراحة ونوعي أولادنا وشبابنا قبل ما يوصلهم أي شخص يحاول يغرر فيهم أو يستغل فضولهم
ورسالة لكل شاب
إنت أغلى من إنك تضيع مستقبلك بسبب لحظة تهور أو تجربة عابرة لا تخلي حدا يقنعك إنه المخدرات بتحل المشاكل أو بتخليك تنسى همومك لأنها بالحقيقة بتخلق مشاكل أكبر وبتسلبك أجمل سنوات عمرك
اختَر أصحابك بعناية واملأ وقتك بالعلم، والشغل والرياضة والهوايات وخلي عندك هدف تعيش عشانه وإذا شفت صاحبك ماشي بطريق غلط لا تتركه وقف معه وانصحه وساعده يرجع للطريق الصحيح
مجتمعنا قوي بشبابه، ومستقبل الأردن بأيديهم وكل شاب يحافظ على نفسه هو بحافظ على أهله ووطنه فلنقف جميعاً صفاً واحداً ضد المخدرات ولنجعل الوعي سلاحنا الأول لأن الوقاية اليوم خير من الندم غداً بعرف الأوضاع صعبه ولكن هذا الشي ما بخلينا نعمل على اذية نفسنا ومن نحب بنحبكم وبنحب تكونوا بخير أنتم وعائلاتكم.
